不如一陣落粉麵檔食碗粉

劉細良話：「其實要談香港人的文化身份，最普及而有效的題材，不是『香港你向何處去』這類余秋雨式的文化詠歎調，我認為談食是最直接。」真係好鬼睿智。所以，用返廣東話寫香港嘢食就最fit。今次講下粉麵檔。

白底紅字嘅招牌，一塊畀蒸氣攻到矇矇矓矓嘅玻璃，隔住個喺度用篩篩走麵上面尐水嘅淡定呀叔，但係又隔唔住尐牛雜腩汁嘅香味。其實香港除咗七仔多，粉麵檔都有唔少，好似每區都有一兩間。

其實我都幾中意食粉麵類嘅嘢，又或者話，我係唔中意食飯。不過粉麵檔呢，就唔太係我杯茶。我近年比較多食米線，因為我個人都幾重口味，自細就中意食濃味嘅嘢。可能係因為我呀媽廚藝真係麻麻，由細到大都中意懶健康咁落少兩粒鹽，又煮得唔多好食，咁我咪自自然然中意出街食味精囉。

講返粉麵檔，香港好多粉麵檔都好…清淡，好聽講句就清淡，老實講句就淡貿貿咁。尐湯白潺潺，一睇就覺得無蒞味道。不過呢，我都會間中去下粉麵檔，一蒞便啦，二蒞，出街食尐份量對我蒞講太大份啦，次次都食到勁飽勁辛苦，粉麵檔就啱啱好啦！雖然我唔算話食盡全香港，不過呢，都有一兩間心水粉麵檔。

第一間應該人人都聽過，就係天后嘅華姐清湯腩。不過我對上一次食，已經係年幾之前嘅事啦，不過你諗下，三十幾蚊，咁嘅質素仲想點呀，呀之呀左想食咗人隻車咩！但係上次食嘅感覺都仲係好正，我之前都幾中意食牛嫁，食車仔麵個尐都會叫牛腩，但係我食完華姐嘅牛腩之後，真係覺得其他牛腩係屎。佢尐清湯腩話就話清，但其實牛味好香，重點係夠腍！出面尐牛腩鞋到無朋友，嚼到勁攰，佢尐牛係好好食，又唔會話太多筋搞到好溜。尐湯我覺得都ok，唔會話太淡，好有屋企湯feel。聽人講華姐難食咗，我都唔知呀，因為我為咗環保盡量少食牛，所以今年行年宵都無食佢啦。

仲記得以前中學，間中唔帶飯出去食，蒞蒞去去都係個幾間，我又窮窮地，下下都廿幾我覺得都幾甘下。然後有次，我個friend就帶咗我去一間粉麵檔道食。個陣一碗野十四蚊炸！仲要味道唔差嫁！一碗水餃米（我怕肥，唔食河粉），都有成四、五粒水餃，仲好足料嫁！所以粉麵檔就成為咗我哋幾丁友嘅天堂啦！可能就係咁，對「粉麵檔」呢樣嘢有特別嘅情意結咁。又或者，我係真心中意食囉，哈哈哈！

不過呢，要講我嘅最愛，就係荃灣嗰間雄記！雄記同我中學去開嗰間一樣，都係白底紅字招牌。雄記最出名好似係個自製春卷，唔係你想象嗰種春卷，而係個樣好鬼似牛脷酥嘅炸魚肉條。食落煙煙韌韌，但又又唔係叫自己做魚肉燒賣但又無魚肉嗰種，佢真係魚肉蒞嫁撞鬼！

不過其實呢，粉麵檔對我蒞講最大嘅意義唔係佢嘅粉麵，係佢嘅辣油！好多出名嘅粉麵檔，佢嘅辣油都好出名。雄記最正嘅嘅我反而覺得係佢嘅辣油。其實佢唔係油，係醬，對我哋尐怕肥死港女蒞講，唔係油可以任落唔嬲，真係感動到流馬尿。你睇，佢嘅辣醬唔係紅色嫁！青青地咁，我同你講，呢種色嘅辣先最香。劣質嘅辣其實無資格叫「辣」，佢只可以算「對舌頭嘅刺激」。真正嘅辣重點唔在於激，在於香。佢嘅辣醬，唔係辣脷嗰種，辣喉多尐，呢種辣可以畀你頂得耐尐，唔會食一啖就要停，可以keep住食。一食呢，辣啦唔使講，但之後你嗒真尐，會有陣椒類嘅重味，又有應有嘅辣香。最正係食到咁上下，尐醬同尐湯已經完美咁水乳交融，尐湯就夠曬味，同一般嘅淡貿貿清湯底差好遠嫁！就係因為佢個辣醬，我先會encore呢間嘢。不過呢間嘅講到其他餸都好似好正咁，下次食可以試下魚肉春卷以外嘅嘢。

香港除咗茶記，其實粉麵檔都係好獨特嘅飲食文化。而粉麵檔呢種風格，係大集團點都做唔到嘅。不如一陣落粉麵檔食碗粉呀？