講粗口其實有何問題。
記得以前中學，有一個基督徒朋友話：我唔明點解要講粗口，係你用文字表達唔到你情緒，先至要用粗口表達。當時懶係偽文人嘅我表示認同。但人越大，就諗，那麼感嘆號、語氣助詞呢？「食飯。」同「食飯！」所表達既可以好唔同，但你會否話用感嘆號只係基於詞不達意？「嘩！點解？」同「唉，點解？」亦係天淵之別，咁你亦唔會話因為表達能力差先要用語氣助詞搭夠。粗口某程度上都只係一種生動啲嘅語氣助詞，「唔知」，「唔撚知」，後者生鬼得多，而粗口，亦都係粵語文化博大精深的結晶。
中學讀基督教學校，基督徒講粗口彷彿係危坐地獄邊緣。但其實講粗口除所謂嘅「失見證」外，不妥之處何在，又，點解講粗口就係失見證？
大部份反粗口既人，理據都係「粗口帶侮辱性」、「唔尊重」。呢層我某程度上都認同吧，一類如問候老母，用性器管官作人身攻擊嘅粗口的確冒犯且侮辱，不宜出口。但一類粗口其實不帶侮辱性，例如「仆街」、「妖」之類，「笑到仆街」我搵唔到侮辱嗰位喺邊。
基督徒另一反粗口既理據，好似係話基督徒唔應該輕易動怒，云云之類。但上文提到，粗口作為語氣詞，並不與憤怒劃上等號。就算有一類粗口用法確係用以咒罵，咁是否代表我唔講粗口就好溫和。我自已都唔講粗口的，但燥底已經唔係我性格，而係我體質。你說粗口是基於詞不達意，咁調轉來講，我表達能力夠好，唔用粗口一樣可以講野惡毒過毒氣雙子。一言敝之，粗口不代表憤怒，憤怒亦不一定有粗口。
其實我雖然唔講粗口，但真係好中意聽人講粗口。
（好啦，其實有時會偷偷在好朋友面前講少少。）
沒有留言:
張貼留言